Калі калабарацыямі ў фэшн-сферы ўжо нікога не здзівіш, то сярод беларускіх майстроў гэта пакуль што рэдкасць, а дарма. Звярніце ўвагу на гэты эфектыўны інструмент, з дапамогай якога можна не толькі ствараць нешта сапраўды ўнікальнае і самабытнае, але і абменьвацца з партнёрамі па калабарацыі аўдыторыямі і прыцягваць увагу патэнцыйных пакупнікоў.
Расказваем, якія бываюць калабарацыі, дзеля чаго іх варта рабіць, як іх арганізоўваць і на што зважаць пры выбары партнёра.
Што такое творчая калабарацыя?
Калабарацыя – гэта сумесная ўзаемавыгадная супраца двух або болей майстроў, дызайнераў, мастакоў і нават блогераў, вынікам якой становіцца нейкі новы праект або выраб.
Больш за тое, удзельнікі калабарацыі могуць прыдумаць і рэалізаваць такія спалучэнні, якія ніхто раней не мог уявіць – гэта выклікае дадатковую цікавасць.
Калабарацыі ствараюць і файную магчымасць для інфанагоды – іх абмяркоўваюць, пра іх расказваюць сваёй аўдыторыі.
Не абавязкова распрацоўваць нешта глабальнае. Сумесны допіс, фотасесія вашых з партнёрам вырабаў, узаемапіяр і нават супольны конкурс – усё гэта таксама прыклады калабарацый. Але да такіх формаў калабарацый варта таксама падыходзіць творча.
Прыклады калабарацый
Апошнім часам айчынныя брэнды адзення актыўна эксперыментуюць з прынтамі і папулярызуюць творчасць самых розных беларускіх мастакоў і ілюстратараў. Напрыклад:
Карціна Надзеі Леановіч на байках ад Honar :
Ілюстрацыя Лізы Хіхлушкі на футболках ад “Холад”:
Карціна Наташы Неўмержыцкай на футболцы ад PAR:
Калабарацыі сярод майстроў можна сустрэць не так часта, але яны таксама ёсць. Напрыклад, завушніцы, якія стварылі сумесна майстрыца Юлія (брэнд упрыгожванняў СОВЕСТЬ) і мастак Сяргей Русакоў:
Нам прыемна, што ўдзельнікі #фотадзень_ад_ALOVAK карыстаюцца выніковымі фота для самых розных калабарацый – ад допісаў, у якіх адзначаюць сваіх калег, да сумесных разыгранак. Прыклады ад мануфактуры аўтарскіх рэцэптаў Maroziva, майстрыцы Сашы Баршчовай, праекта “Лёгкая мова”:
Больш прыкладаў калабарацый ад беларускіх дызайнераў і майстроў глядзіце ў артыкуле ніжэй.
Мэты калабарацыі
🔹 Пашырэнне аўдыторыі і павелічэнне пазнавальнасці
Удзельнікі калабаў абменьваюцца паміж сабой аўдыторыямі. Аб’ядноўвацца дзеля сумеснай працы могуць як майстры-калегі, так і тыя, хто працуе ў розных сферах.
🔹 Творчыя эксперыменты
Калабарацыі дазваляюць майстрам праявіцца, паказаць свае здольнасці найлепшым чынам, паспрабаваць сябе ў новым для сябе матэрыяле і нават спалучыць неспалучальнае!
🔹 Скарачэнне выдаткаў
Калабарацыя – добры спосаб падзяліць выдаткі (на вытворчасць / фотасесію / прасоўванне)
🔹 Гучная інфанагода
Так, гэта таксама можа стаць мэтай калабы, але ў такім выпадку варта звярнуць увагу на трэндавыя тэмы і кірункі, якія прыцягнуць увагу людзей.
🔹 Новыя ўражанні
Творчыя калабарацыі – гэта заўсёды чэлендж для сябе, новы і карысны досвед, які дазваляе пазнаёміцца бліжэй з цікавымі творчымі людзьмі
Як арганізаваць калабарацыю: інструкцыя
Важна: які пункт інструкцыі для вас будзе першым, вырашаць вам. Магчыма, у вас ужо ёсць задумка калабарацыі, а магчыма, вы дакладна ведаеце, з кім бы хацелі яе арганізаваць.
1) Выбіраем партнёраў
Каб калабарацыя была не толькі паспяховай, але і прыемнай, выбіраючы партнёра для супрацы, варта ўлічыць наступныя фактары:
🔹 Падабенства каштоўнасцяў
Падумайце, якія якасці і перакананні патэнцыйнага партнёра вам важныя, даведайцеся больш пра таго, каму хочаце прапанаваць ідэю супрацы.
🔹 Аўдыторыя партнёра
Тут няма нейкіх агульных парад, усё залежыць ад мэтаў калабарацыі і вашых асабістых пажаданняў. Аўдыторыі партнёраў могуць быць як сходнымі – калі вам будзе дастаткова нагадаць пра сябе тым, хто і так пра вас ведае, так і цалкам рознымі – каб знайсці новых патэнцыйных пакупнікоў.
2) Фармулюем мэты
Перад запускам калабарацыі важна выразна сфармуляваць яе мэты – ад гэтага будзе залежыць выбар выніковага прадукта і інструментаў прасоўвання. Вашы мэты з партнёрам/-і могуць адрознівацца, але важна, каб яны не супярэчылі адна адной.
3) Прыдумляем прадукт
Падумайце, які выніковы прадукт вы бачыце: ці гэта будзе адзін выраб, ці лімітаваная калекцыя, ці шырокі тыраж.
Але што б гэта ні было, важна, каб выніковы прадукт адлюстроўваў вашы каштоўнасці, каб у ім адчуваліся і гарманічна спалучаліся моцныя бакі партнёраў.
Прыклад сумесных вырабаў: кераміка Таццяны Рудзені з драўлянымі вечкамі ад майстэрні “Апілкі“
4) Фіксуем дамоўленасці
Важна не толькі дамовіцца, але і зафіксаваць нейкім чынам тое, пра што вы дамовіліся з партнёрам – хто адказвае за лагістыку, за вынікі, як вы дзеліце выдаткі і прыбыткі, аўтарскія пытанні і іншыя моманты. Гэта можна зрабіць ці ў дагаворы, ці хаця б у гугл-дакуменце.
5) Заяўляем пра сябе
Калабарацыя можа быць геніяльнай, але калі пра яе ніхто не даведаецца – будзе сумна.
Пра калабарацыі можна і трэба расказваць у сацсетках партнёраў не толькі пасля стварэння гатовага прадукта, але і да гэтага моманту: публікуйце анонсы, дзяліцеся працэсам стварэння. За такім назіраць заўжды цікава!
6) Аналізуем эфектыўнасць
Тое, як вы будзеце ацэньваць вынікі калабарацыі, будзе залежыць ад пастаўленых мэтаў: жадаеце падвысіць пазнавальнасць – глядзіце на колькасць рэпостаў і адзнак у сторыз; разлічваеце павялічыць прыбытак – сачыце за колькасцю продажаў; імкняцеся пашырыць аўдыторыю – улічвайце прагляды, падпіскі, падабайкі і каментары.
Паказ-калабарацыя адзення Ton-in-ton, упрыгожанняў ад Vedovka і вязаных балаклаў ад Svetlana Bast
Бонус! 10 ідэй для калабарацый
Стварэнне сумесных вырабаў з іншым майстрам (тэкстыль + вышыўка, дрэва + свечкі, кераміка + роспіс і г.д.).
Прапанова ілюстратару / мастаку распрацаваць прынт для вашых вырабаў.
Супраца прадметнага дызайнера і майстра-рамесніка (напрыклад?).
Супраца людзей творчых прафесій з блогерамі (напрыклад, стварэнне мерчу ці партыі вырабаў).
Стварэнне вырабаў для аграсядзібаў, кавярняў, сувенірных крамак музеяў, фотастудый.
Актыўнасці ў сацсетках і не толькі: супольныя эфіры, марафоны, інтэрв’ю, падкасты.
Стварэнне мерчу для выставы ці іншай імпрэзы.
Сумесны ўдзел у маркеце з майстрам, чые вырабы добра спалучаюцца з вашымі (тэкстыль + кераміка, упрыгожанні + аксэсуары і інш.)
Удзел у супольных фотаздымках, напрыклад, у #фотадзень_ад_alovak
Стварэнне сумесных адукацыйных прадуктаў: майстар-класаў, курсаў, гурткоў.
Прыклад калабараыі дызайнеркі ўпрыгожанняў Анастасіі Псеўкінай і адзення Honar
Карціна мастачкі Ірыны Малукалавай на футболках ад “Холад”
***
Пішыце ў каментарах, на якія калабарацыі вы гатовы? З кім бы хацелі пасупрацоўнічаць? Няхай клёвых і запамінальных калабарацый стане болей!